ਕਲਮ ਦੇ ਨਾਂ ’ਤੇ ਕਾਰੋਬਾਰ—ਭੋਗਪੁਰ ਤੋਂ ਟਾਂਡਾ ਤੱਕ ‘ਸ਼ਿਕਾਇਤ ਫਾਰਮੂਲਾ’ ਚਲਾਉਂਦਾ ਕਥਿਤ ਪੱਤਰਕਾਰ ਬੇਨਕਾਬ

ਜਲੰਧਰ: 20 ਦਸੰਬਰ 2025 ( DIN Beauro ): ਪੱਤਰਕਾਰਤਾ ਦਾ ਮਕਸਦ ਜਨਹਿੱਤ ਹੁੰਦਾ ਹੈ, ਪਰ ਜਦੋਂ ਕਲਮ ਨੂੰ ਨਿੱਜੀ ਕਮਾਈ ਦਾ ਜ਼ਰੀਆ ਬਣਾਇਆ ਜਾਵੇ, ਤਾਂ ਉਹ ਪੱਤਰਕਾਰਤਾ ਨਹੀਂ ਰਹਿੰਦੀ। ਜਲੰਧਰ ਦਾ ਇੱਕ ਕਥਿਤ ਪੱਤਰਕਾਰ ਇਨ੍ਹਾਂ ਦਿਨਾਂ ਇਸੇ ਕਾਰਨ ਚਰਚਾ ਦੇ ਕੇਂਦਰ ਵਿੱਚ ਹੈ, ਜਿਸ ’ਤੇ ਆਰੋਪ ਹਨ ਕਿ ਉਹ ਪੰਜਾਬ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਨਜਾਇਜ਼ ਉਸਾਰੀਆਂ ਦੀਆਂ ਸ਼ਿਕਾਇਤਾਂ ਪਾ ਕੇ ਬਾਅਦ ਵਿੱਚ “ਸੈਟਿੰਗ” ਦਾ ਰਾਹ ਅਖਤਿਆਰ ਕਰਦਾ ਹੈ। ਸੂਤਰਾਂ ਅਨੁਸਾਰ, ਇਹ ਕਥਿਤ ਪੱਤਰਕਾਰ ਭੋਗਪੁਰ, ਦਸੂਹਾ, ਹੁਸ਼ਿਆਰਪੁਰ, ਟਾਂਡਾ ਸਮੇਤ ਕਈ ਇਲਾਕਿਆਂ ਵਿੱਚ ਲਗਾਤਾਰ ਸ਼ਿਕਾਇਤਾਂ ਦਰਜ ਕਰਵਾ ਚੁੱਕਾ ਹੈ। ਸ਼ਿਕਾਇਤ ਪਾਉਣਾ ਕਾਨੂੰਨੀ ਹੱਕ ਹੈ ਅਤੇ ਕੋਈ ਗੁਨਾਹ ਨਹੀਂ, ਪਰ ਦੋਸ਼ ਇਹ ਹਨ ਕਿ ਸ਼ਿਕਾਇਤਾਂ ਦਾ ਮਕਸਦ ਕਾਨੂੰਨੀ ਕਾਰਵਾਈ ਨਹੀਂ, ਸਗੋਂ ਆਪਣੀ “ਸੈਟਿੰਗ” ਬਣਾਉਣਾ ਹੁੰਦਾ ਹੈ। ਜਿਵੇਂ ਹੀ ਸ਼ਿਕਾਇਤ ਅੱਗੇ ਵਧਦੀ ਹੈ, ਤੁਰੰਤ ਮਾਲਕਾਂ ਨਾਲ ਸੰਪਰਕ ਅਤੇ ਗੱਲਬਾਤ ਸ਼ੁਰੂ ਹੋ ਜਾਣ ਦੀ ਚਰਚਾ ਹੈ। ਇਹੀ ਨਹੀਂ, ਇਸ ਕਥਿਤ ਪੱਤਰਕਾਰ ਦੇ ਖ਼ਿਲਾਫ਼ ਪੁਰਾਣੇ ਵਿਵਾਦ ਵੀ ਮੌਜੂਦ ਹਨ। ਕੁਝ ਸਾਲ ਪਹਿਲਾਂ ਉਸ ਦੇ ਆਪਣੇ ਹੀ ਪੁਰਾਣੇ ਦੋਸਤ ਨਾਲ ਹੋਏ ਝਗੜੇ ਦਾ ਮਾਮਲਾ ਪੱਤਰਕਾਰ ਭਾਈਚਾਰੇ ਵਿੱਚ ਕਾਫ਼ੀ ਚਰਚਿਤ ਰਿਹਾ ਸੀ। ਉਸ ਸਮੇਂ ਇਹ ਘਟਨਾ ਇੰਨੀ ਚਰਚਾ ਵਿੱਚ ਰਹੀ ਕਿ ਕਈ ਪੱਤਰਕਾਰਾਂ ਨੇ ਖੁੱਲ੍ਹੇਆਮ ਉਸ ਦੀ ਕਾਰਗੁਜ਼ਾਰੀ ਅਤੇ ਨੀਅਤ ’ਤੇ ਸਵਾਲ ਉਠਾਏ ਸਨ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਕਥਿਤ ਪੱਤਰਕਾਰ ਪਹਿਲਾਂ ਆਪਣੇ ਆਪ ਨੂੰ ਵੱਡੇ ਮੀਡੀਆ ਚੈਨਲ ਨਾਲ ਜੋੜ ਕੇ ਪੇਸ਼ ਕਰਦਾ ਹੈ, (ਜਦ ਕਿ ਹੈ ਇੱਕ ਨਿਊਜ਼ ਪੋਰਟਲ ਦਾ ਮਾਲਕ ਜੋ ਨਿਊਜ਼ ਪੋਟਲ ਦਾ ਲੋਗੋ ਵੀ ਲਗਾਇਆ ਹੈ ਉਹ ਵੀ ਵੱਡੇ ਚੈਨਲਾਂ ਨਾਲ ਮਿਲਦਾ ਜੁਲਦਾ ਬਣਾਇਆ ਗਿਆ ਹੈ ਤਾਂ ਕਿ ਲੋਕਾਂ ਦੇ ਮਨ ਵਿੱਚ ਵੱਡੇ ਚੈਨਲ ਦੇ ਬਾਰੇ ਹੀ ਸੋਚਿਆ ਜਾਵੇ) ਫਿਰ ਸ਼ਿਕਾਇਤਾਂ ਦੀ ਲੜੀ ਦਿਖਾ ਕੇ ਆਪਣਾ “ਅਸਰ” ਸਾਬਤ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ। ਜਿਹੜੇ ਲੋਕ ਉਸ ਦੀ ਗੱਲ ਨਹੀਂ ਮੰਨਦੇ, ਉਹਨਾਂ ਦੇ ਖ਼ਿਲਾਫ਼ ਨਕਾਰਾਤਮਕ ਖ਼ਬਰਾਂ ਲਿਖੇ ਜਾਣ ਦੇ ਦੋਸ਼ ਵੀ ਲਗ ਰਹੇ ਹਨ । ਸੀਨੀਅਰ ਪੱਤਰਕਾਰਾਂ ਦਾ ਸਾਫ਼ ਕਹਿਣਾ ਹੈ ਕਿ ਅਜਿਹੀ ਕਾਰਗੁਜ਼ਾਰੀ ਪੂਰੇ ਮੀਡੀਆ ਦੀ ਸਾਖ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ। ਸ਼ਿਕਾਇਤਾਂ ਜਨਹਿੱਤ ਲਈ ਹੋਣੀਆਂ ਚਾਹੀਦੀਆਂ ਹਨ, ਨਾ ਕਿ ਨਿੱਜੀ ਲਾਭ ਲਈ। ਜੇਕਰ ਸ਼ਿਕਾਇਤਾਂ ਨੂੰ ਸੌਦੇਬਾਜ਼ੀ ਦਾ ਸਾਧਨ ਬਣਾਇਆ ਜਾ ਰਿਹਾ ਹੈ, ਤਾਂ ਇਹ ਕਾਨੂੰਨੀ ਪ੍ਰਕਿਰਿਆ ਦੀ ਗੰਭੀਰ ਬੇਇਜ਼ਤੀ ਹੈ। ਹੁਣ ਮੰਗ ਉੱਠ ਰਹੀ ਹੈ ਕਿ: ਜਲੰਧਰ ਤੋਂ ਹੁਸ਼ਿਆਰਪੁਰ ਤੱਕ ਪਾਈਆਂ ਗਈਆਂ ਸਾਰੀਆਂ ਸ਼ਿਕਾਇਤਾਂ ਦੀ ਨਿਰਪੱਖ ਜਾਂਚ ਹੋਵੇ । ਸ਼ਿਕਾਇਤਾਂ ਤੋਂ ਬਾਅਦ ਹੋਈਆਂ ਕਥਿਤ “ਸੈਟਿੰਗਾਂ” ਦੀ ਤਫ਼ਤੀਸ਼ ਕੀਤੀ ਜਾਵੇ । ਮੀਡੀਆ ਦੇ ਨਾਮ ’ਤੇ ਕੰਮ ਕਰਨ ਵਾਲੇ ਅਜਿਹੇ ਲੋਕਾਂ ’ਤੇ ਨੈਤਿਕ ਅਤੇ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ । ਅੰਤਿਮ ਸਵਾਲ : ਕੀ ਕਲਮ ਸੱਚ ਲਈ ਹੈ ਜਾਂ ਸੌਦੇਬਾਜ਼ੀ ਲਈ? ਨੋਟ: ਇਹ ਰਿਪੋਰਟ ਜਨਤਕ ਸੂਤਰਾਂ ਅਤੇ ਮਿਲੀਆਂ ਜਾਣਕਾਰੀਆਂ ’ਤੇ ਆਧਾਰਿਤ ਹੈ। ਸੰਬੰਧਿਤ ਵਿਅਕਤੀ ਦਾ ਪੱਖ ਆਉਣ ’ਤੇ ਪ੍ਰਕਾਸ਼ਿਤ ਕੀਤਾ ਜਾਵੇਗਾ।